BIBEXŞÎNE

çiqasî vê zilmê min bi qîmet kiribe

û bi firaqan bûbim tiştek jî

çiqasî ez bi evîn û stranan dawa qîmetê xwe bikim

û ev teşqelê mirovan ji min re bûbin azmun jî

kes nagihê tahma wê êşê

hêja ye mirov li ber hewara jana esîl be

gidî bisekin

 

ez poşmanê te

min çiqas danustendin kirîbin

û ez çiqasî gilî bikim jî

di xurdê min de ye

ku paşeroj şiqaman li min bixe

 

her çiqas min deşt û çiya li xwe elimandibin

û heta bi riwekan jî bûbine dijminê min

hemû gelemşetîya min

ji bo ku ez bi te re tenê nemînim

lê vaye li bal te me

 

dîsa giliyê xwe li bal te dikim:

bibexşîne, ezbenî

ez mazlumê xwe

 

her çiqas serê min tevlîhev be

û biryarên min bi nezantî û bi lez bin jî

gelo çi bikim ji lehiya hestên kelgerm

ku min li ber xwe bibe jî

tu min tebût bike

û bibore Xwedîyê min

ez nezanê hestên xwe

 

her çiqas min pesnê yarê

bi hestên demborî da be jî

jixwe eyb e

ku ji te pê ve ez pesnê kesî din bidim

 

min qebhetên nezanî nivîsandibin jî

û her çiqas hunera min

bertekên zarokî bin jî

jixwe min çi neheqî kiribe

tê li min diqelibe

 

bibexşîne, ez gorî

ez, zalimê xwe

 

her çiqas di erdeke dagirker de

nasnameke min a durû

çandeke me ya duzimanî hebe jî

li me negre

bila seata mirina gel niha neyê

vê sedsalê jî xwe li me bigre

 

her çiqas êşên me ne weke hev bin jî

derengmayînê li paş bixe

her çiqas ya dilê xwe min bi nav nekiribe jî

tu pê dizanî bê ez dixwazim bighêm çi miradî

 

çiqa min xayîntî li hêviyan kiribe

weke gelekî kedîkirî

weke xulamekî ferman qebulkirî

rastî xweş e: em xayinê xwe

 

her çiqas ji bo forsa xwe ez tevgeriyabim

û min navê xwe li ser her tiştî qewartibe jî

ji xwe her tişt ên te ne

û navê herî xweşik û mezin jî

divê min mohra te

li her dilê fetihkirî xistiba

 

lewra navên te zindî ne

lê yên min dibin dîrokeke derewîn

 

her çiqas min deynê xwe pêşî înkar kiribe

dûvra bi derengî hiştibe

û gelek caran min hesabê te nekiribe jî

ez deyndarê te yê her tiştî

ez dehîyê te

 

piçekî din xwe li me bigre

dibe ku kad bide dara bawerîyê

li ser secadê

ez evdekî li berxweketî

 

bibexşîne, li min negre

ez, zalimê mazlum

zalimekî mazlum

mazlûmekî zalim…

 

— Zîver Îlhan